Aizawl 6th June, 2024 (Thurs): Vawiin khan Mizo National Youth Front (MNYF) Hqrs chuan thuchhuah siamin, tunhnaiah Tourism Minister Lalrinpuii chuan ama Department subject pawh nilo Art & Culture Deptt subject daih -Music Festival chungchanga a thutlukna siam mipui hmaah a puangchhuak a, chu chu Anthurium Festival titawpa a aiah Leitlangpui Music Festival neih tur thu a puanchhuah kha a ni, an ti.

MNF Thalai chuan, sorkar deptt hrang hrangte hna leh mawhphurhna in semna dan pawimawh tak Mizoram Allocation of Business Rules 2019 ah chiang takin Music chu Art & Culture Deptt thuneihna(subject) a ni a. RTI zawhna Art & Culture Deptt in an chhannaah chuan Music leh a kaihhnawih chu sorkar dan dinglai anga an thuneihna a ni a,Tourism Minister in Lungleia Music Festival huaihawt tur a sawi hi officialin an hriatpui loh thu RTI zawhna an chhannaah Art & Culture Deptt chuan an ziak chiang a ni, an ti.

"Allocation of Business Rules 2019 angin Music hi Tourism Deptt subject list ah a tello a ni. Hetiang anih laia amah aia Minister Senior zawk C.Lalsawivunga, Art & Culture Minister palzuta Music Festival chungchanga thutlukna a siam hi kalphung thar thalo tak a ni, Val Upa Council (VUC) ten zilhhau vat se, he dan bawhchhiatna tenawm tak avang hian CM pawhin action a lak ngei kan phut a ni," tiin an tarlang.

MNF Thalai chuan, Anthurium hi Horticulture Deptt subject liau liau a ni a, chuvang chuan a puala festival siam thin pawh hi Tourism Deptt leh Horticulture Deptt in tangruala an huaihawt thin a ni. Chutiang nisi Tourism Minister in Horticulture Minister ,Horticulture Deptt officials leh anthurium chingtu society (ZAGGS) te pawh rawn lova ama thu thua a titawp ngawt mai hi thuneihna hman sualna (misuse & abuse of power) chiang tak a ni a, Anthurium Festival hi Central sorkar Tourism Ministry leh Ministry dangte pawhin an ngaihpawimawh hle a, India rama Tourism Award sangber ”Best Tourism Village of India Award 2023, Reiek khuain a dawn theihna chhanah pawh Reieka Anthurium Festival hlawhtlinna hian a thawhhlawk hle, tiin an thuchhuah ah tarlan a ni.

"Horticulture Minister in Zo Anthurium Grower Society Ltd Collection Centre Ramhlun North a tlawhnaa Anthurium Festival neih zui an lo rawtna a thlawp thu leh neih zui zel anih nana puih a tum thu a sawi kha tha kan ti a. Dan bawhchhetu Tourism Minister Lalrinpuii dodala a subject neitu ngei Horti Minister Prof Lalnilawma'n anthurium festival neih chhunzawm zel dan tur a ngaihtuah chu a tihawm tak ti a ni. Lungleia Music Festival neih pawh MNF thalaite chuan tha kan ti a, dan dinglai angin Art & Culture Deptt ngeiin huaihawt se kan ti a, Anthurium festival tihtawp phah kher ngai lovin a subject neitu Art & Culture Deptt in huaihawt mai se a that zawk kan ring a ni," an ti bawk.